Velkomin heim | Gunnlaugur Bjarnason

Gunnlaugur Bjarnason - kemur fram í tónleikaröðinni Velkomin heim sunnudaginn 5. júlí klukkan 16. Tónleikaröðin er á vegum FÍT og FÍH í samstarfi við Hörpu. Tónleikarnir fara fram í Hörpuhorni, á annarri hæð Hörpu. Aðgangur er ókeypis og öll hjartanlega velkomin. -- Selfyssingurinn Gunnlaugur Bjarnason hóf söngferil sinn í bílskúrsböndum en flutti sig snemma yfir í klassískan söng. Árið 2020 lauk hann framhaldsprófi í klassískum söng frá Menntaskóla í tónlist og þremur árum síðar lauk hann meistaranámi í sama fagi frá Konunglega tónlistarháskólanum í Den Haag árið 2023. Gunnlaugur hefur á síðustu árum stimplað sig rækilega inn í íslensku söngsenuna og hefur tekið þátt í fjölmörgum óperuuppfærslum á Íslandi, núna síðast í La Bohème með sviðslistahópnum Óði og í óperunni Sæmundi með hópnum Animato. Gunnlaugur hefur einnig komið fram á tónlistarhátíðum, bæði hér heima og úti, til dæmis Bergen Festspillerne, Sönghátíð í Hafnarfirði, Þjóðlagahátíð á Siglufirði og fleiri. Þá hefur Gunnlaugur líka unnið náið með tónskáldum að frumflutningi nýrri verka. Gunnlaugur er einnig íslenskufræðingur að mennt og sem slíkur hefur hann,við góðan orðstír, stýrt hlaðvarpinu Flimtan og fáryrði með Ármanni Jakobssyni, prófessor í íslenskum bókmenntum fyrri alda.